मायाधीशं मदनमलनं मन्त्रमूर्तिं महेशम्।
गङ्गाधीशं गरलशमनं गर्वनाशं गिरीशम्।।
योगाधीशं यमभयहरं योगगम्यं यमेशम्।
भूताधीशं भुजगमुकुटं भावगम्यं भजेऽहम्।।१।।

māyādhīśaṁ madanamalanam mantramūrtiṁ maheśam |
gaṅgādhīśaṁ garalaśamanaṁ garvanāśaṁ girīśam ||
yogādhīśaṁ yamabhayaharaṁ yogagamyaṁ yameśam |
bhūtādhīśaṁ bhujagamukuṭaṁ bhāvagamyaṁ bhaje’ham ||1||

प्रज्ञातीतं प्रलयकरणं प्राणनाथं प्रणेशम्।
कालातीतं कपटहरणं कालरूपं कपीशम्।।
वाक्यातीतं विविधवरदं विश्वनाथं वरेण्यम्।
भावातीतं भवमलहरं भावलिङ्गं भजेऽहम्।।२।।

prajñātītaṁ pralayakaraṇaṁ prāṇanāthaṁ praṇeśam |
kālātītaṁ kapaṭaharaṇaṁ kālarūpaṁ kapīśam ||
vākyātītaṁ vividhavaradaṁ viśvanāthaṁ vareṇyam |
bhāvātītaṁ bhavamalaharaṁ bhāvaliṅgaṁ bhaje’ham ||2||

विश्वाधीशं वृषभवहनं वीरकेतुं विशेषम्।
विश्वाकारं विकटनयनं वीरभद्रं विशालम्।।
वेदान्तान्तं विटपवरणं वीतरागं विभूतम्।
वन्दे वेद्यं विमलमतिदं वामदेवं वरेण्यम्।।३।।

viśvādhīśaṁ vṛṣabhavahanaṁ vīraketuṁ viśeṣam |
viśvākāraṁ vikaṭanayanaṁ vīrabhadraṁ viśālam ||
vedāntāntaṁ viṭapavaraṇaṁ vītarāgaṁ vibhūtam |
vande vedyaṁ vimalamatidaṁ vāmadevaṁ vareṇyam ||3||

नागाधीशं निखिलपितरं निर्विकल्पं नरेंद्रम्।
नित्यानन्दं नितविलसनं नीलकण्ठं नटेशम्।।
निर्वाणान्तं नमितचरणं नित्यशुद्धं निरीहम्।
नादब्रह्मं नवनिधिधरं नन्दिनं नौमि नित्यम्।।४।।

nāgādhīśaṁ nikhilapitaraṁ nirvikalpaṁ narendram |
nityānandaṁ nitavilasanaṁ nīlakaṇṭhaṁ naṭeśam ||
nirvāṇāntaṁ namitacaraṇaṁ nityaśuddhaṁ nirīham |
nādabrahmaṁ navanidhidharaṁ nandinaṁ naumi nityam ||4||

साक्षात्ब्रह्मं सकलजनकं सत्यमूर्तिं सुरेशम्।
सोमाधीशं सहजगमनं सर्पहारं सुवक्त्रम्।।
सर्वाधारं समरदलनं सारतत्वं सुबीजम्।
वन्दे सत्यं सुरशरणदं सर्वकालं सुतीर्थम्।।५।।

sākṣādbrahmaṁ sakalajanakaṁ satyamūrtiṁ sureśam |
somādhīśaṁ sahajagamanaṁ sarpahāraṁ suvaktam ||
sarvādhāraṁ samaradalanaṁ sāratattvaṁ subījam |
vande satyaṁ suraśaraṇadaṁ sarvakālaṁ sutīrtham ||5||

हीनद्वन्दं हिमगिरिनिभं हंसनाथं हठेशम्।
हीनक्रोधं हृदयसुखदं हाटकेशं हरीशम्।।
हिंसामारं हरिणनयनं हर्यश्वं ह्यम्बुजालम्।
वन्दे शम्भुं हरिहितकरं ह्लादनं हस्तमालम् ।।६।।

hīnadvaṁdaṁ himagirinibhaṁ haṁsanāthaṁ haṭheśam |
hīnakrodhaṁ hṛdayasukhadaṁ hāṭakeśaṁ harīśam ||
hiṁsāmāraṁ hariṇanayanaṁ haryaśvaṁ hyambujālam |
vande śambhuṁ harihitakaraṁ hlādanaṁ hastamālam ||6||

मार्तण्डेशं मनसि वसनं मुक्तिनाथं महाक्षम्।
मन्त्राधारं मृदुलकथनं मातृदेवं महेन्द्रम्।।
माधुर्यौघं मधुरहसनं मीननाथं मुनीन्द्रम्।
मोक्षद्वारं मृगतनुधरं मुण्डमालं भजेऽहम् ।।७।।

mārtaṇḍeśaṁ manasi vasanaṁ muktināthaṁ mahākṣam |
mantrādhāraṁ mṛdulakathanaṁ mātṛdevaṁ mahendram ||
mādhuryaughaṁ madhurahasanaṁ mīnanāthaṁ munīndram |
mokṣadvāraṁ mṛgatanudharaṁ muṇḍamālaṁ bhaje’ham ||7||

गोतीतं यं गणपतिगुरुं गोवृषेशं गुणेशम्।
प्रज्ञानन्दं पशुपतिमजं पञ्चवक्त्रं प्रजेशम्।।
धर्माधारं धृतिमतिधरं ध्यानयोगोपलभ्यम्।
वन्देऽहं तं कलिमलहरं पुष्करस्थं परेशम्।।८।।

gotītaṁ yaṁ gaṇapatiguruṁ govṛṣeśaṁ guṇeśam |
prajñānandaṁ paśupatimajaṁ pañcavaktraṁ prajeśam ||
dharmādhāraṁ dhṛtimatidharaṁ dhyānayogopalabhyam |
vande’haṁ taṁ kalimalaharaṁ puṣkarasthaṁ pareśam ||8||

॥ इति प्रतिज्ञविरचितं श्रीमहेशभावाष्टकं सम्पूर्णम्॥
॥ iti pratijña-viracitaṁ śrīmaheśabhāvāṣṭakaṁ sampūrṇam ॥